මේ පිටුවේ
ඉලක්කම් සහ විස්තර අමතක වෙන්නේ ඇයි
ගෙදර සිංහලෙන් කතා කරන, ඕස්ට්‍රේලියාවේ අවුරුදු ගානක් ඉංග්රීසියෙන් වැඩ කරන කෙනෙක්ට මේ විභාගය ලේසි වගේ පේනවා. ලකුණු කැපෙන්නේ segment එක ඉවර වුණාට පස්සේ, ඇහුණු කරුණු ටිකෙන් එකක් දෙකක් ගිලිහෙන එකෙන්.
GP appointment එකක් හිතන්න. දොස්තර අහනවා හිසරදය කොච්චර කාලයක් තිබුණද, පෙනීමේ වෙනසක් තියෙනවද, හිසරදය දරුණු වෙලාවට ඔක්කාරයක් දැනෙනවද කියලා. ඔබට ඔක්කොම තේරෙනවා. ඒත් සිංහලෙන් කියද්දී 'දරුණු වෙලාවට' කියන කොන්දේසිය ගිලිහෙනවා, එතකොට දොස්තර ඇහුවේ මොකක්ද කියන එකම වෙනස්.
ඉංග්රීසි ඇහෙන පැත්තේ ප්‍රශ්නයක් නැහැ. ප්‍රශ්නය තියෙන්නේ පිටතට එන පැත්තේ. සිංහල වාක්‍යයේ ක්‍රියාපදය අගට එන නිසා, ඉංග්රීසි වාක්යයක් සිංහලට හරවද්දී පිළිවෙළම ආපස්සට හරවන්න වෙනවා; ඒ පිළිවෙළ හදන අතරේ මුලින් ඇහුණු ඉලක්කම මතකයෙන් ලිස්සලා යනවා. මේක හදාගන්නේ පුරුද්දෙන්.
පටිගත කරපු segments ටිකක් ආපහු අහලා බැලුවම, ගිලිහෙන්නේ මොනවද කියන එකට රටාවක් තියෙන බව පේනවා:
- ඉලක්කම් සහ ඒකක: කීයද, කී දෙනෙක්ද, කී දවසක්ද
- නැහැ කියන එක: 'වැඩ කරන්නේ නැහැ', 'ලියකියවිලි නැහැ'
- ලැයිස්තුවක අන්තිම අයිතමය
- 'නම්', 'දක්වා', 'විතරක්' වගේ කොන්දේසි වචන
- නම් සහ ආයතන: Centrelink, Medicare, Year 2
Notes ගන්නේ කොහොමද
වචන 35ක් ලියන්න වෙලාවක් නැහැ, ලියන්න ගියොත් ඇහෙන එකත් නවතිනවා. Note එකට ලියන්නේ මතකයෙන් ලිස්සලා යන ඒවා විතරයි.
- ඉලක්කම් ඇහුණු ගමන්, ඉලක්කමෙන්ම. ඒකකයත් එක්ක ලියන්න: 'සති 2', 'දවස් 14', 'වයස 7'.
- නැහැ කියන එක පේන්න. '✗ work', '✗ ලියකියවිලි' වගේ ලකුණක් දාන්න. එකම වචනයක් අතහැරිලා අර්ථය හරියටම අනිත් පැත්තට හැරෙන්නේ මෙතනයි.
- ලැයිස්තු උඩින් යටට, එකකට එක පේළිය. විභාගය බලන කෙනා අයිතම ගණන් කරනවා.
- නම් සහ ආයතන ඉංග්‍රීසියෙන්ම. Centrelink, Medicare, Part B, Year 2. Note එකේදී ඒවා සිංහලට හරවන්න යන්න එපා.
- කොන්දේසි වචන තියාගන්න. 'up to', 'max', 'if', 'only'. ඒවා ගියොත් ආවරණය හෝ ඉල්ලීම වෙනස් වෙනවා.
- ඔබටම තේරෙන කෙටි යෙදුම්. 'appt', 'wk', 'mth', 'addr', 'rpt', '2day' වගේ. 'mo' කියලා ලිව්වොත් පස්සේ ඒක 'more' ද 'morning' ද කියලා හිතෙනවා.
- වේගවත් භාෂාවෙන් ලියන්න. සිංහල, ඉංග්රීසි, Singlish, ඊතල, symbols; ඔක්කොම එකට මිශ්ර වුණාට කමක් නැහැ. Note එක කියවන්නේ ඔබ විතරයි.
ලියන්නේ නැති දේත් තියෙනවා. 'Good morning', 'How can I help you today', 'I'm sorry to hear that' වගේ ඒවා හැම dialogue එකකම එනවා, ඒවා ලියන්නේ නැතුවම මතකයේ තියෙනවා. ඒවා ලියන්න ගියොත් ඊළඟට එන ඉලක්කම මගඇරෙනවා.
පෑන නවත්තන්නේ කථිකයා නවත්තපු ගමන්. එතනින් පස්සේ බලන්නේ කඩදාසිය, ඇහුම්කන් දෙන්නේ නැහැ. Note එක දිහා බලාගෙන, ලියපු පේළි පිළිවෙළට කියාගෙන යන්න.
Note-taking උදාහරණයක් (ඉස්කෝල ඇතුළත් කිරීමේ dialogue එක)
පහත තියෙන්නේ ඉස්කෝලයකට දරුවෙක් ඇතුළත් කරන dialogue එකක එක segment එකක්. නිලධාරියා කියන ලියකියවිලි හතරයි අන්තිම ප්‍රශ්නයයි විතරයි note එකට යන්නේ; ඉතුරු ටික සාමාන්‍ය කතාබහ නිසා මතකයෙන් තියාගන්න පුළුවන්. ඔබේ symbols වෙනස් වුණාට කමක් නැහැ, එකම කරුණු ටික note එකේ ඉතුරු වුණාම ඇති.
ඉස්කෝලයකට දරුවෙක් ඇතුළත් කරන dialogue එකක තුන්වෙනි segment එක. නිලධාරියා ඕන ලියකියවිලි හතරක් කියලා, අන්තිමට ප්‍රශ්නයක් අහනවා. 'ඇහුණු segment එක' කියෙව්වාම, ඔබ නම් මොනවද ලියන්නේ කියලා තීරණය කරලා, ඊට පස්සේ 'Note එක' බලන්න.
School Administrator (EN)I see. For enrolment, we'll need a birth certificate, immunisation records, a school report from the previous school, and proof of address. Do you have those with you today?
docs: - birth cert - immun rec - rpt (prev sch) - proof addr → have 2day?
පළවෙනි පේළියේ 'docs:' කියන්නේ ලැයිස්තුවක් එනවා කියන මාතෘකාව. ඊට පස්සේ ලියකියවිලි හතරට පේළි හතරක්, එකකට එකක්: 'birth cert' කියන්නේ birth certificate, 'immun rec' කියන්නේ immunisation records, 'rpt (prev sch)' කියන්නේ previous school එකෙන් එවපු report එක, 'proof addr' කියන්නේ proof of address. ලැයිස්තුව උඩින් යටට ලියන්නේ කියද්දී පේළි ගාන ගණන් කරලා හතරම කිව්වද කියලා බලන්න පුළුවන් නිසයි. අන්තිමට ඊතලයක් දාලා 'have 2day?' කියන්නේ 'Do you have those with you today?' කියන ප්‍රශ්නය; '2day' කියන්නේ today, ප්‍රශ්න ලකුණෙන් ඒක ප්‍රශ්නයක් බව මතක් වෙනවා. 'I see', 'for enrolment' වගේ ඒවා ලියන්නේ නැහැ, ඒවා මතකයෙන්ම එනවා.
කඩදාසියේ ඉතුරු වුණේ පේළි පහයි, හැම වචනයක්ම කෙටි යෙදුමක්. 'docs:' කියලා මාතෘකාවක්, ලියකියවිලි හතරට පේළි හතරක්, අන්තිමට 'have 2day?'. හතරෙන් තුනක් කිව්වොත් එකක් අතහැරුණා කියන එක examiner ට පැහැදිලිවම පේනවා. ඒ නිසා ලැයිස්තු එකින් එක පේළියට ලියලා, කියලා ඉවර වුණාම පේළි ගාන ගණන් කරලා බලන්න. 'Good morning', 'I see' වගේ ඒවා ලියන්නේ නැහැ, ඒවා මතකයෙන්ම එනවා.
Note-taking guide එක (PDF) සහ workbook එක
නොමිලේ ලියාපදිංචි වුණාම, notes වලට පාවිච්චි කරන කෙටි යෙදුම් සහ symbols ලැයිස්තුව තියෙන guide එක PDF එකක් විදියට ලැබෙනවා. සෞඛ්‍ය, නීතිමය, Centrelink ඇතුළු dialogue 10කට segment අනුව ආදර්ශ notes සහ සිංහල පැහැදිලි කිරීම් තියෙන workbook එකත් app එකේම බලන්න පුළුවන්.
සිංහල පැත්තෙන් ලකුණු කැපෙන තැන් සහ ඒවාට practice
Dialogue එකක නිලධාරියෙක්, දොස්තර කෙනෙක් හෝ ගුරුවරයෙක් ඉන්නවා, ඒ එක්ක සාමාන්‍ය පුද්ගලයෙක්. ඉංග්රීසි 'you' එකට සිංහලෙන් ඔබ, ඔයා, ඔබතුමා කියලා තෝරන්න තියෙනවා. එකක් තෝරලා dialogue එක ඉවර වෙනකම් ඒකෙම ඉන්න. NAATI කථිකයාගේ ආචාරශීලී මට්ටමට ගැළපෙන්න කියලා විශේෂයෙන් කියනවා, මට්ටම වැරදුණොත් quality of language (භාෂාවේ ගුණාත්මකභාවය) යටතේ ලකුණු කැපෙනවා. ආතතියෙන් හිටියම බොහෝ දෙනෙක් පොතේ සිංහලට මාරු වෙනවා ('මම යමි', 'මෙය අයදුම්පතකි'), ඒත් clinic එකක ඉන්න කෙනෙක් එහෙම කතා කරන්නේ නැහැ. පටිගත කරපු එක ආපහු අහලා මට්ටම මාරු වුණ තැන් ලකුණු කරගන්න; ඒ ලැයිස්තුව ටිකෙන් ටික කෙටි වෙනවා.
ක්‍රියාපදය අගට එන එකට කරන පුහුණුව සරලයි. Note එකේ clause වලට 1, 2, 3 කියලා අංක දාන්න. 'ඔබ ගිය සතියේ දාපු අයදුම්පත, ඒක අසම්පූර්ණ නිසා, ආපහු එවලා තියෙනවා' වගේ එකක් අංක තුනක් විදියට ලියාගත්තාම, කියද්දී පිළිවෙළ හරවන එක පහසුයි. මතකෙට බාර දුන්නොත් අතහැරෙන්නේ හැම විටම අග කෑල්ලයි.
ඉලක්කම් ලියලා, කියද්දී note එක දිහා බලන්න. 'fifteen' සහ 'fifty' අතර වෙනස මතකයෙන් තියාගන්න යන එක අනවශ්‍ය අවදානමක්, ඒක insurance claim එකක මුදලක් නම් අර්ථයම විකෘති වෙනවා. සිංහලෙන් 'ලක්ෂ 5' කිව්වොත් ඉංග්රීසියෙන් කියද්දී ඒක 500,000ක් වෙන්න ඕනේ; 'ලක්ෂ' කියන වචනය එහෙමම ඉංග්රීසි පැත්තට ගෙනියන්න එපා.
Dialogue එකේ කථිකයා 'මට කැක්කුමක් තියෙනවා' කිව්වොත්, ඔබ කියන්නේ 'I have a pain' කියලා. 'She says she has a pain' කියලා නෙවෙයි. සිංහල කථනයේ 'එයා කිව්වා ... කියලා' කියන ස්වරූපය ස්වාභාවික නිසා මේක ලේසියෙන්ම වෙනවා. පළමු පුරුෂයෙන් කියන එක නීතියක් විදියට තියාගෙන පුහුණු වෙන්න.
ඉංග්රීසි පැත්තටත් එකක් තියෙනවා. Accent එකට ලකුණු කැපෙන්නේ නැහැ, ඒ නිසා ලංකාවේ ඉංග්රීසි accent එක ගැන කරදර වෙන්න එපා. ඒත් වචනයක් ඕස්ට්‍රේලියාවේ වෙන දෙයක් අදහස් කරනවා නම් කතාව වෙනස්: ලංකාවේ 'hotel' කියන්නේ කෑම කඩයකට, 'get through' කියන්නේ පාස් වීමට, 'cousin brother' කියන්නේ මස්සිනා කෙනෙකුට. ඒ තැන් වල restaurant, pass, cousin කියලා කිව්වොත් අර්ථය ඒ විදියටම යනවා.
වචනයක් හිරවුණාම කරන්න ඕන දේ
පටිගත කිරීම පටන් ගත්තාට පස්සේ වෙන ලොකුම වැරැද්ද තමයි ආපහු මුලට ගිහින් පටන් ගැනීම. මැදදී වචනයක් හිරවුණාම, ලස්සනට කියන්න ඕන කියලා හිතලා, දෙවෙනි වතාවට පටන් ගන්නවා. ඒ දෙවෙනි වතාවේ තව දෙයක් අතහැරෙනවා. අගට යනකම් නොනවත්වා කියන්න.
වචනයක් අමතක වුණොත් ඒක වටේට කියන්න. 'Tenancy bond' එකේ නම මතක නැත්නම් 'කුලියට ගන්නකොට කලින් දාන මුදල' කිව්වාම අර්ථය අනිත් පැත්තට යනවා. නිශ්ශබ්දව බලාගෙන ඉන්න එකට වඩා ඒක ගොඩක් හොඳයි, මොකද ගොඩක් වෙලා පැකිලෙන එකටත් quality of delivery (කියන විදිය) යටතේ ලකුණු කැපෙනවා.
එකතු කරන්නත් එපා. 'ඒ කියන්නේ...' කියලා ඔබේම පැහැදිලි කිරීමක් දැම්මොත් ඒක එකතු කිරීමක්, ඒකට ලකුණු කැපෙනවා. දෙපාරක් කියන එකත් අවදානමක්: දෙවෙනි වතාවේ වචන ටිකක් වෙනස් වුණොත් අර්ථයත් වෙනස් වෙන්න පුළුවන්. කිව්වා නම් කිව්වා, ඊළඟ segment එකට යන්න.
මේක වෙනම පුහුණු කරන්න පුළුවන්. Segment එකක් අහලා, එකපාරක් විතරක් කියලා, පටිගත කිරීම නවත්තලා ආපහු අහන්න. පැකිලුණු තැන් සහ අතහැරුණු කරුණු ලියාගන්න. දිගටම කරගෙන ගියාම ඒ ලැයිස්තුව කෙටි වෙන එක ඔබටම පේනවා.
පියවර 6ක practice plan එකක්
දවසකට විනාඩි 30ක් තිබ්බත් ඇති. ඒත් හැම දවසේම ඕනේ; සතියකට වතාවක් පැය තුනක් කරන එකෙන් මේ හැකියාව හැදෙන්නේ නැහැ.
- මිම්ම ගන්න. Notes නැතුව dialogue දෙකක් සම්පූර්ණයෙන් කරලා පටිගත කරන්න. ආපහු අහලා අතහැරුණු කරුණු ලියාගන්න. ලකුණු ගානක් නෙවෙයි, අඩුපාඩු ලැයිස්තුවක් තමයි මෙතනදී ඕන.
- Notes විතරක්. Segment එක අහන්න, note එක ලියන්න, පරිවර්තනය නොකර note එක බලලා ඇහුණු කරුණු ආපහු කියන්න. පරිවර්තනය පස්සේ එකතු කරන්න.
- දිශා දෙකෙන්ම, දවසකට segment දහයක් විතර. දවසකට වසමක් දෙකක් අරගෙන යන්න: සෞඛ්‍ය, නීතිමය, Centrelink සහ සමාජ සේවා, නිවාස, රක්ෂණ, බැංකු.
- දුර්වලම වසමට වැඩිපුර වෙලාව. ඔබේ අඩුපාඩු ලැයිස්තුවේ නැවත නැවත එන දේ මොකක්ද කියලා බලලා ඒකට විතරක් සැසියක් වෙන් කරන්න.
- සම්පූර්ණ dialogue දෙකක් නොනවත්වා. විභාගය තියෙන වේලාවටම, ඒ කාමරයේම. Dialogue දෙකේම අවම 29/45ක් ඕන නිසා දුර්වල dialogue එක අත ඇරලා යන්න බැහැ.
- අන්තිමට, අලුත් දෙයක් නැහැ. උපකරණ පරීක්ෂා කරන්න, කාමරය හදාගන්න, දවසකට dialogue එකක් කරලා නවත්තන්න.
මේ පියවර හය ඉවර වෙන්න කොච්චර කල් යනවද කියන එක ඔබට තියෙන වෙලාව අනුව වෙනස්. 'මෙච්චර දවසකින් pass වෙනවා' කියලා කියන්න පුළුවන් සංඛ්‍යාවක් නැහැ, එහෙම කියන පොරොන්දු ඕන තරම් තියෙනවා. ඔබේ මිම්ම වෙන්න ඕනේ පටිගත කරපු segment එකකින් අතහැරෙන කරුණු ගාන අඩු වෙනවද කියන එකයි.
නොමිලේ mock test එකක් සහ practice session එකක් තියෙනවා. Segment එකක් අහලා, record කරලා, කොහෙද අතහැරුණේ කියලා segment අනුව බලාගන්න.
නොමිලේ mock test එකක් කරන්නYouTube practice වීඩියෝ පාවිච්චි කරන හැටි
Practice වීඩියෝ වල dialogue එකක් සම්පූර්ණයෙන්ම ඇහෙනවා, හැම segment එකකට පස්සෙම countdown එකක් තියෙනවා. ඒ ඇතුළේ කටින්ම කියලා, ඊට පස්සේ ආදර්ශ පරිවර්තනය එක්ක ගළපලා බලන්න. එකම වීඩියෝ එක තුන් වතාවක් පාවිච්චි කරන්න පුළුවන්: පළවෙනි වතාවේ notes නැතුව, දෙවෙනි වතාවේ notes එක්ක, තුන්වෙනි වතාවේ පටිගත කරලා ඔබේම හඬ ආපහු අහලා.
බලාගෙන ඉන්න එකෙන් වැඩක් නැහැ. පෑනකුයි කඩදාසියකුයි ළඟ තියාගෙන, කථිකයා නවත්තපු ගමන් countdown එක ඇතුළේ කටින්ම කියන්න. නොකියා බැලුවොත් ඔබ පුහුණු කරන්නේ තේරුම් ගැනීම විතරයි, ඒක දැනටමත් ඔබට තියෙනවා.
සිංහල practice වීඩියෝ
අලුත්ම practice වීඩියෝ
- 2026 ජූලිසිංහල Sinhala NAATI CCL Practice: Centrelink — Payment Application
- 2026 ජූලිසිංහල Sinhala NAATI CCL Practice: GP Visit — Persistent Headaches
- 2026 ජූනිසිංහල Sinhala NAATI CCL Practice: Superannuation — Rollover Enquiry
- 2026 මැයිසිංහල Sinhala NAATI CCL Practice: Employment Support — Job Search
Note-taking, වචන සහ විභාග සූදානම ගැන English වීඩියෝ playlist එකකුත් එකම චැනලයේ තියෙනවා.
විභාග දවසේ setup එක
CCL එක NAATI ගේම වචන වලින් 'online only'. ගෙදර ඉඳන්, proctor කෙනෙක් යටතේ කරන නිසා, කාමරයයි උපකරණයි කලින්ම හදාගන්න ඕනේ. NAATI ලැයිස්තුගත කරන දේ මේකයි:
- camera, microphone සහ speaker තියෙන laptop එකක් හෝ computer එකක්. Headset පාවිච්චි කරන්න බැහැ.
- දෙවෙනි camera එකට phone එකක් හෝ tablet එකක්.
- අන්තර්ජාල වේගය: download අවම 10 Mbps, upload අවම 1.5 Mbps.
ඒ එක්කම සද්දයක් නැති කාමරයක් ඕනේ. දොර වහන්න, notifications නවත්තන්න, ගෙදර අයට වෙලාව කලින්ම කියලා තියන්න. විභාග දවසේ මේසය උඩ මොනවා තියාගන්න පුළුවන්ද කියන එක NAATI තීරණය කරන දෙයක් නිසා, book කරාට පස්සේ එවන නිල උපදෙස් සහ naati.com.au බලලා තහවුරු කරගන්න.
පුහුණු වෙනකොටත් ඒ දවසේ ඉන්න කාමරයේම, ඒ වේලාවටම කරන එක වටිනවා. උදේ 9ට කරන්න ඕන දෙයක් රෑ 11ට පුරුදු වෙලා තියෙන එකෙන් වැඩක් නැහැ. ප්‍රතිඵල එන්න සති හතරක් හයක් යන නිසා, දවස තෝරද්දී EOI එකට ඕන දවසත් හිතලා තෝරන්න.